‘Serende mut-on ç’ubr-on’

 K’oçepe oran. P’ot’e badi va iyeran, ancaği itişineran. Nak’u 3’ana golaxt’asere golaxt’as muç’e mevaşk’vit hişo bz’iremt. Cemil dayis na no3’eraserek haşo iduşunams, haşo it’us. Ma ti vidisis ‘Cemil dayi, miti toli mo to gak’nas, opşa vorsi gz’iri’ ma vu3vis a komoydi3inu do ‘ma berenobaşe beri haşo vore k’izum’’ ya mi3’u. Oxap’aru cevoç’it’is p3adi-çi ask’erişe idusis k’omutanimuşik’ ti –daha 3’arist’eri, yeni yetme delik’anli ot’uşa-  a no3adu. ‘Ham bere opşa narin on, monk’a dulyape mo oxinapamt’ deyi dutembiğu onbaşipes. Demekçi k’at’a k’ale gamik’aten. Ot’as himus dulyaşe toli va uşk’urdu. Opşa pelaperi ot’u. Dunyas eni çetini dulyape komoysvaru. Pi3’ari oxorepe, serendepe, karmat’epe 3’opxu xepepemuşite. Hak’ute dibağuk’o vorsi... Uk’aye eç’opu dudimuşi do gurbet’işe k’oyt’oçu. İdu svalepes ti divi st’eri santralepe do fabrik’ape kododgu. Emek’li iyu do çoyişe goytusis  ti soti k’ale va ik’açu. Elan daha pa3xalams, axenenşi ikums. 

Çoyişe idatis, Murut’i aviya-şe golulut’atşa gza çenaris na elasvarun dişk’apes vorsi go3’erit. K’at’a k’ale mjora medvas do kakalaç’i st’eri xomas deyi na cosvaru ç’armamuşi z’iratere. Hindos gogaşinançi ham Cemil dayi-şi dulyan. Himust’eri dişk’a mis casvaren? Dulya mis axenen? Hik’u mest’uresayeri...   

Cemil dayi, mişk’unçi si galepes opşa gogilvapun. Hini ar da şk’imi şeni meyogasvaraset’u-yi? 

Ma 80 3’aneri vore. 1927 iyen da. Baynazepe-şi Ayşe Bula-k emk’ozdu. P’ap’u Ayşe u3’omet’es. Mektebişe va milvapun. Şk’uni vak’it’is mektebi va ot’u. Uk’aye ti hişo kodosk’udu. Eceşk’imi-k it’ut’u-çi “xepey sk’ep’ali dvak’açusis ust’aşi yanine komepçi.”  Berenobaşe beri xepe dulya maxenet’u, malimbet’u. Enimt’i daha Cabati-s (Sulak) Tahsin Koşari-şi oxoriy viçalişi (1944) Yegeni İbrahimi3’aşk’ala. Himuşuk’ale Tordovati-s. Eme Osma dayi, ma, Çerimi İbrahimi viçalişit. Uk’aye mutahit’i (Selahattin Ozden) yanine dulyas kamaft’i. Ust’a gorumt’u. Ma ti ust’a vot’i. Noğa (Pazar-1953) do Mapavre-s (Çayeli) isk’elepe dop’it. Hikele Radari-şe kogolaft’it. Fransuzi, Alamani do İngilisi opşa firmapet’es. Ma Fransuzepeşk’ala viçalişi jur 3’ana. Hindora şuk’ulu Rize’şe kogolaft’it. Oxorepe p’it. Uk’aye Çutaxya T’avşanli Tunçbileği-s masumani termik santralis viçalişi a 3’ana. Hikele Bandurma-s Etibanki-şe vidit, vit’oxut 3’ana ti hik fabrik’ape p’it. Boraks, asit, poborant, hidrojen, gaz fabrik’ape do buhar santrali. Him gzaşe Bursa Uludaği-s Volfrang fabrik’asi. 1980’işi yazi-s emekli deviyi. Çoyişe kovigti. Maxenenşi vikum artuk. 

Si muç’e ust’a iyi? Mi şk’ala diguri?

Berenobaşe beri a mutxape ok’oç’adu xaz’i mayet’u. Ust’apek içalişamt’eyşa mevifiçiramt’i. Ma va viçinem, morderi emiceşk’imi (Must’afa) ust’at’u. Seferbirluğis, Erzurumi-şe va mvalu. Babaşk’imik (Murut’i Hakk’i) ti ğuni mo3’opxamt’u. P’ut’uci opşa alimbet’u. Uk’aye nanaşk’imik çoyis, Yegeni İbrahimi3’aşi yanine komemçu. A 3’ana himuşk’ala goft’i do muya muç’e na iyen kodeviguri.

İbrahim dayi opşa titiz ot’u ramet’li. Himuşk’la muç’e ok’uveli? 

Hişo uşk’uran. Ma himu şk’ala na viçalişi st’eri miti şk’al va viçalişi. Opşa vorsi ok’ovuvelit. Ma mi3’omet’upes uci mepçamt’i, himus ti ma opşa alimbet’u. Bazi svalepes para va naçet’es birden. Himuk gamiğamt’u do şk’imi payi komomçamt’u. Yegen, si beçi dogaç’is deyi. Him soyi.

Si serende ust’a ore. Naminepes giçalişapun? 

Heee. (a komoydi3inu) Serende xvala-yi? İri tevuli mixinapun. Oxori, karmat’e, yaşiği bile miç’adapun.  Ali dayi-şi k’asp’ari onas ramet’li p’ap’usk’anik, Çerimi Ali-k, Ferat dayi do İbrahimi3a-k xiz’ari şk’orumt’es, şk’u ti pç’adumt’it. 1944’işi 3’anas ar tane vit’oxut k’ruşis ot’u. Him do made Xunari-s otxo xu tane pi3’ari karma’te mixinapun. Memet’ina karma’te, Xasa karmat’e, ar jur daha. Başk’a çoyepes ti miçalişapun. Taa Xemşinepe-şa milvapun. Moro.

Ust’aluği na ikumt’it svalepes dogutut’it-i yoğ ise ulut mulut’it-i?

Mendra svalepes dobgutut’it. Yak’ini on na vulut movulut’it. Radari vikumt’itşa eşk’evulut cevulut’it. Evela Xunari-şe noğaşa k’uçxete, uk’aye noğaşe K’ok’sovati-şa arabate. Ee k’olayi va on. P’i dotanaşe moysela do gzay cegutare.

Cemil dayi, ela sk’ani şk’ala a serende kodobdgat...

Eyi, evela arguni moyovidvat do nca ok’vatuşe vidatere. Serende mut-on ç’ubr-on. Ç’ubri st’eri na nuxondun başka muti var on. Himus hiçi muti va ağoden. Hindos ç’ubri opşun hanepes, ama ne gza on, ne ti araba ceğmalaşe. Nca ep’k’vatik’ot şuk’ale arape govuşk’oramt’it. Dobyazamt do makvali st’eri kogamaviyonamt’it, çoşeli. Morderepe otxo, daha ce3’ulvape jur şurik gondveri kociğamt’es. Hindos meci dixo hakele hik k’uçxe va medgamt’es. Koçepe meci ayiri, xorz’alepe meci ayiri ikumt’es. Hele oxori o3’opxus kok’ipinet’es. Carepe ti kok’osvaramt’es.

Huy xepepe govinz’ik’at. Serendeşeni na p’k’vatit otxo tane ç’ubri nca-te temeli dopk’orat. Otxo tane ti direği, mçxu ncalepeşi. Boğazi. Hini ti kok’op’k’orat. Him direğepes otxo tane yan çalma komepçat. Otxo tene ti parpa dopşk’orat. Mtucis mo eyalas deyi. Parpa mçxu ncalepeşe gamaviyonamt, ecere va eyinç’as na elevudgatere. Otxo daha parpa dudi keyevuç’adat hinis. Jur da oşk’endaşe parpa dudi xolo. Otxo ti perçe ncalepe. Tudeni k’ati dovoçodinit. Goyti hikele, çoşe tere. Çoşepe ti mok’ovit’oçat şuk’ule jindo otxo nca keyobdvat. Himu şuk’ale k’amarape mepxvat. Ana covdeşi pi3arepe, him do ceri meteyizi -şi çoşepe gamapsvarat. Ar daha otxo nca keyobdvat do art’ik’at’is kodolovoxunat. Hus ti ‘sarabağepe’ kocevoç’adat. Oşk’enday baba ke3’evumxanat. Çati ok’aças deyi. Huy do mele artuk mak’asepe kocevosvarat. Merteği kocevoç’adat çeremit’a şeni. Hikele teçari koceft’at tude. Covdeşi pi3arepe dopşk’orat do kodolovoxunat. Pi3ari xiz’arite pşk’orumt, himus ti ust’aluği diç’is. Doğramape msk’va iz’iras deyi hikele hakele komevudagat. Oşk’endani k’uşaği ti kocevoç’adat şuk’ale ek’na ti kocevobat. Meteyizi-şi araluğepe ti kodolovoxunit-i? Serende diçodu. Ha msk’ala mogomoç’ondran. Muyate ext’anene? Çeremit’ape komoği, keyevutvat. Lazut’i moxt’as artuk cevobğatere.       

Serende nenate a xovi kodobdgit? Ya eseden-şi...

A serende ar-jur tutas i3’opxen. Oxmarare malzeme do are dulyas 3adums. En evela oxori sahibis nayonare do go3’irasere onaşe ç’ubri ncalepe k’vatare. Serendeşeni na oxmarare ncalepe k’oşk’uyonare. Ana direğepe şeni jurneçidovit, artepe şeni eçi 3’aneri ç’ubri nca diç’is. K’at’a nca va iyen. Serendeşi perçepe  –gamulur do gulur ya- opşa sağlam ot’asere. Hele k’arik’ape... Covde himuk ok’açams. 

Morderi do 3’ulu serende ar va iyen xoşi... 

Aa. Serende boy boy iyen. A morderi, ar da 3’ulu serende iyen. Bazi serendepes  mbağu ayen, a t’arafis dolap’i st’eri eludginaman. Çimi ti meteyizli... Morderi serendepe jur k’ati iyen. Jini k’at’is eyilven do goylven. Cedgare sva (let’a) morderi on na serende ti morderi iyen. Oxinapamsis nca fazla uğun do morderi serende gorams na ti hişo. Çimi svas nak’işli –medageri- serendepe ti mixinapun. Argunite mevudagamt’it, mo ok’omant’alan deyi mevuğaramt’it.

Serende şeni temeli va eşk’iğamt’ito do nak eyodgamt’it? Muç’e dogutinamt’it?

Enimt’i serendeşi sva gamapkosamt’it do otxo tane kva kodobdumt’it, terazite. Nca eyodvaloni diyuk’osis nca eyobdumt’it. Yoğ ise xolo kva meşk’evudumt’it. Sade serende var, divi st’eri oxorepe ti hişo dobdgamt’it. Ee Oxori do serende havada iyen. İxi moxt’uk’os, ya ti opşa mtuk’os elininktuk’o elininkten. Him enimt’işe xesap’are da. Heşeni k’at’a koçi dulya var on. Ust’amu vorsi kot’uyi muti va ağoden. A serendes va comç’imas do 3’ari va eç’opas na oşi-oşidojurneçidovit 3’ana nuxondun. Ç’ubris muti va ağoden, va k’3un. Elat’roxasere çeremit’ape gonkturare k’at’a 3’anas. 3adare da.     

Evelis k’at’a oxoris serende elu3’opxamt’es-i?

Megza na uğunis ho. Serende oxorişe mendra va iyen. Ot’uk’o ot’uk’o 5-6 met’ro.

Serende oxorişi gamaxmaran. Evelis opşa lazut’i iyet’u. İri him vimxot’it. Hist’eri serendepe ot’u-çi lazut’i doloxe nçxvarumt’es. Lazut’i xvala ti var. Demiri oşk’uri, mç’ipe xurma, m3xuli, topri, p’ek’mezi... Mtucik k’ibri na cedgams iri tevuli hik şinaxumt’es. Serendeşi k’at’a ka’ale araluk’li pi3ari gotveri iyen. İxi amulun. Daha evelden mşk’erite ceşumt’es. Çelti u3omeran. Lazut’i vorsi xomas deyi. Him hist’eri hast’eri ust’a-şi dulya va on. Esasli ust’a diç’is.

Muyape oxmaramt’it?

Enimt’i daha arguni. Uk’aye sk’ep’ali, 3’ulu xiz’ari, bişk’i, rende. Çenarepe medagu şeni 3’ulu-morderi aşmape. Rende st’eri. Nca oyazu şeni cenişi p’ici-te sk’ep’alepe iyet’u. Berci st’eri. Hini voxmaramt’it. Pi3arişeni na diç’iren iri tevuli da.    

K’afri... K’afri dixo iyen-i?

Evelis k’afri dixo ikumt’es. Art’ik’at’is doloxunamt’es. K’afri ti pi3arişet’u. A m3ik’a payi mevut’omalamt’it, xomas deyi. Ma hiçi k’afri dixo va mixinapun na ti k’ok’omixvapun. Çamlihemşini-şi çoyi Mak’revisi –s. Min evelçinuri oxori k’ok’opxvit, daha morderimuşi p’it. Haşo ç’ubri mt’e3işi ok’onk’orerepe gamalu. Oşi 3’anaşe esk’i ot’u ama hiçi muti va ağodudot’u. Otvamuşi ti mturik  mo cet’axas deyi diki doyes do jindo ndik’a msvalepe kocorçesdot’u. Çeremit’a bile va eyutut’u. Zat’i Xemşini-şi (msumexi) oxorepe iri Lazepe-s uxinapuran. Hini jur k’at’i, morderi oxorepes (k’onaği) xet’es.

Ndari, let’a çeremit’ape uk’aye gamaxt’u hindos...

Helbet’e. Çeremit’ape haminepes ip’t’is Paniç’i-şe moğamt’es. Uk’aye uk’aye Samsoni do Tok’at’i Erbaa-şe moğmalu coç’es. Evelis k’uyipe ot’u, çeremit’a do tuğula ç’umt’es. Şk’uni çoyis Şukri dayi-k (Eşu) ç’umt’u, çerani livadis. Ç’alimri let’a diç’is himu şeni. Him k’eç’opamt’u. K’alop’epe uğut’u, hinis kocedumt’u. Toyç’ite doşk’oramt’u. Ğvari xepe a keyusumt’u. Diyet’u çeremit’a.  

Pi3ari oxorepe muç’e ikumt’it?

Oxori ti serende st’eri iyen da. Oxori şeni evela let’a gamiğam. Serendeşe daha morderi sva diç’is. Let’a dozona şuk’ale otxo tane ç’ubri nca kododum. Mjora nakele na nodums doxesap’iyi odape doteksimam. Ham doxunu, ham docinu şeni deyi. Oxori sahibik ti muç’e na gorums gi3’omes. Evelis çenefi gale iyet’u. Oxori doloxe va vikumt’it. Uk’aye uk’aye evala kva, himu şuk’ale ti tuğula oxorepe komoşk’iğes. Puci na nok’oraman tudeni k’at’i k’arat’aşişe, jimu tuğula svarumt’es. Eni ji ti on3xeni, puci yemi molabğalu –nçala oxominu- şeni.

Pi3ari oxoris ti ç’ubri nca oxmaramt’it-i?

Moro. İri ç’ubri var. Bazi svalepes 3ipri ixmaren ama en opşa ç’ubri nuxondun. Him do made mç’oni do nez’i ti ixmaren. Hini ti nuxondun. Oxori, serendeşe ayiri on. Oxoris iri tevuli iyen, konamsk’vanen. Daşk’uri ok’ogzalu şeni ocakluği. Himu k’ap’ulas ot’rebi, dişk’a cosvaramt’es do oxominamt’es. Bazi ti k’at’upe golicinet’es.  Niçnxunamt’es, guri nantxet’es. Cari cexvalu şeni cest’a, daşk’uri jindo k’lemuri, 3’ulu k’uk’ma, ya ti ç’uk’ani celabaman do oşk’omelepe cibaman. Hindos pilit’ape var on. Daşk’uri oği doxeda do ninçxunare.   

A oxorişi mut-on dulya ayni ust’apek ikumt’es-i?

Ho. Jur ust’a iyet’es. Him juri ti ok’iyanet’es do oxori domp’onamt’es. Bazi jur cuma iyet’es. Ramet’li Xelili do Must’afa dayi, Baynazi Nuri do Şukri dayipe hişo ot’es. Ma k’arat’aşi-şe oxorepe ti p’idon. Tuğula baği u3’omeran himus. Tuğula na şumt’u ayiri iyet’u. Şk’u dolodganene svalepe devuxaz’iramt’it do hinik dolodgamt’es artuk. Ma hepeyi 3’ana ramet’li İbrahimi3’aşk’ala (Yaşar) miçalişapun. Bandurma-şe beri.

A oxorişi ust’aluği nak’us gamulut’u ?

Ust’apek ekseri cunluği yovmiye usuli içalişamt’es. Şk’imi vak’it’is yovmiye 2,5 –3 Lira ot’u. Cari ti hinik kçaman. Malzeme nca na ono şeni bazi viyondramt’it xomas deyi. Hindos hişo daha içalimet’u. Ust’a nak’u ndğa idu moxt’u doxesap’umt’i. Oxori na oxinapaserek ti ya ok’iğamt’u, ya ti i3xamt’u. Va eyanç’ek’es vak’it’is bazi şk’u mevut’omalamt’it sum-otxo ndğa, ya ti hinik hik’u hak’us va 3adumt’es. Him artuk kok’ovixalalamt’it.

Ust’aşi a ndğa nak’u sahat on?

Husoneri st’eri ovro sahati va on. Mjora ext’aşe cext’aşa da. Mjora p’i ext’ayşa mo3’uk’ap’are do cari melidvare, mjora ntoli delipşasis naşk’vare. Ust’aşi a ndğa him on. Ye va na hik’u dulya mik moysvarasere?

Karmat’e ya t’k’vi. Karmat’epe muç’e ikumt’it?

Karmat’e ce3ulva na ono şeni ordo içodet’u. Himus ti otxo nca dobdgamt’it do jimu evulut’it. Muyançi? A 3’ulu k’ut’ina şuk’u. Jindo otva komovutumt’it. Ar da omçvere devuyamt’it. Kva keyobdgamt’it. Evelis  -kva va ot’uşa-  3’ari na golulun oluğe ti ncaşe ikumt’es. Morderi txombu nca ek’vatumt’es. Xiz’arite k’ok’oşk’oramt’es, tudendo jişa. Uk’aye guri kogamuğamt’es. 3’ari na doloxt’asere t’arafi daha fazla, tude mç’ipe naşk’umt’es. 20x20 ya ti 30x30 santimi. Hini teçari kok’odgamt’es. Diyet’u oluğe. 

Karmat’e kva nakele moğamt’es? Mik yazumt’u?

Kva na yazums ayiri ot’u. Kvaşi oluğe ti hinik ikumt’es. Karmat’e kva Murğuli-şe mulut’u. Him kva haminepes va iyet’u. Himinepes t’axumt’es do gamiğamt’es. Cedumt’es k’ayiğepes, xop’e zderi noğaşa komoğamt’es. Teçari hak mp’irumt’es do keyodumt’es. Nçaxi devuyamt’it. Him artepek ti moconi, k’arik’a, omçvere duyamt’es.

Ar da k’ayiğepe ot’es xolo ncaşe...

K’ayiğepe ti ç’ubrişe ikumt’es. Feluk’a u3’omet’es. Jur parça ok’odgamt’es do ikumt’es. Mbuli do 3ipri ncaşe tudeni t’abanepemuşi doyek’es şuk’ale eçi santimluği k’arbuğape cusvaramt’es. Mendrik’eri ncalepe k’oşk’uğamt’es. Mşk’eri-şe k’afri gamiyonamt’es. Mşk’eri, nca st’eri va imorden.

Pi3ari oxorepe mo naşk’ves p’iya?

Pi3ari oxori mo naşk’ves, ç’ubri nca moyk’vatu. Serende mo naşk’ves, lazut’i moyk’vatu. Serende muya şeni diç’is en opşa? Lazut’i şeni. Lazut’i va ot’as serende muya are? Ar da oç’u on da. Pi3ari oxoris a sotxaşe daşk’uri konağaluyi oçuletinu var on aşk’va. Eee evelis daşk’uri, oxori oşk’endas vogzamt’it. On3xeni, xomula nçala do çayirite pşeri. Ce3xondureri-şe a paluri kamuk’ap’uk’os diyu da... Esk’i pi3ari oxorepes mtuci izvalet’u. Heşeni k’at’u 3adumt’es.

Lazepe-s, k’at’u teveçeli opşa alimberan. Ham a m3ik’ati mtuci şeni on mecere...

Helbet’e. K’at’u muya deyi 3adare? A lok’mati mtuci şeni. K’at’u na on oxoris mtuci hik’u amvalen da. Serendepe muya deyi parpapes cedgun? Mtucis mo eyalas deyi. Heşeni tudendo direği meçaman. Mtucis parpa va moyank’ap’en. Hindos ji va eyalen. Yoğ ise muti naşk’umt’u-yi? A seris koceşk’omaset’u.

Serende oxinapu mundey naşk’ves Lazepe-k? Soni serendepe do soni ust’ape tk’va oret beçi da...

Serende oxinapu na naşk’ves jurneçidovit 3’ana kot’asere. Ust’a ik’itxa na haminepes var on. Civarepeşi vami aşk’va. Serende mendra dodvi, a mbeli-s sap’i na modvasere ust’a va z’irem. Hus iri tevuli fabrik’as gamazot’aman. Ma maxenenşi k’omşipes mevak’atur, moxt’asere ceri va govoktam.  

Cemil dayi, si pi3ari oxori hem gixinapun hem ti degigutinapun. Esk’i oxorepe do ağanepe a ok’obzumik’ot...

Pi3ari oxori do kvaşi oxori ar iyen-i? Himus dicinasiy ç’umanişe parpali st’eri moyseler. Ne 3’una ot’u evelis ne ti muti. Esk’i dida do badepe pirpila st’eri iktet’es. Opşa nuxondut’es. Pi3’arik rutubet’i moyzdams. 3’ari gobik’o oşums. Kva hişon-i? Ticeri komeçams. Haminepes boyine opşa mç’imt’u ama mi ti romatizma va iyet’u. Ağani oxorepe gamaxt’u şuk’ale ellibin xast’aluği cinz’iru, milet’i kocibğu.    

Cemil dayi, idi svalepey Lazi ore deyi aşiğ ayet’es-i?

Aa. İris alimbet’es. Ma mitis guri va vut’axamt’i, hiçi miti ti ceri va govoktamt’i. İrişi dulya vuyamt’i. Migoranenet’u mepçamt’i. Lazepe kuşk’ut’es zat’i. 93 xarbi muhacirepe ot’es himinepes. Lazepe na var on sva on-i? Bandurma-s viçalişamt’itşa ok’ovitnt’alit a fori. K’oçi epç’opumt’işa dulyaso... Şk’u k’oçi emaç’opet’es him zamanis. Lazuri a kek’ixap’aru ar tanek. Kodomaguru do hiçi orali va viyi. Hemeno haşo “xepe k’elemite goyğari” ma vu3vi do eç’op’aset’u k’oçis toli cevuçi, “xe goğareri na onos muti mo uk’itxam, ma imtihani dop’i” deyi. Daha go3’opes emek’li iyu, telefoni miyams boyine.   

Cemil dayi, Xemşilipe-şi k’onağepe ti iri Lazepe-s uxinapuran. Lazepe diriney ndğaşe ust’aran-i muyaran ağla ise?

Ho ho iri hakele ulut’es. Msumexepe çoği furunci do past’aci oran. Ust’ape, it’ur st’eri  iri Laz oran. Lazepe min evelden ust’a-ran. Evelis ndağepes nca opşut’u. Kva va ot’u daha. Muya an? Nca oxmares da. K’at’a oxoris a mutxape na axenet’u k’oçi iyet’u. Berepek ti hinis no3’et’es do kodiguramt’es. Uk’aye uk’aye ti a ust’as kelvak’atet’es do a 3’ana kogoxt’ek’es kodiguramt’es. A oxori doyuyi tamam da. Ust’aluği iri xesap’i dulyan. Mesela ek’naşi cenişluği nak’u naşk’vare, yuksek’luği nak’u... Hani iri xesap’ara. K’at’a ust’a ti ar va iyen. Esk’i ust’ape hem mimar ot’es, hem muhendisi. Ma muhendisepeşk’ala viçalişamt’i. Muya mi3’omet’es gişk’un-i? “T’k’va şk’uninde vorsi gişk’uran, çunçi ç’ek’irdek’ten yetişmere-t” Huso ma atalya şefi vot’i. Şk’imi dulya zor ot’u. İri tevuli ma goyomz’ut’u. Jureneçi tane ust’a miyonut’u. Ma malzeme eç’opinuşe vulut’i. Ham dulya ham zamanis, ham dulya ham zamanis atere deyi devuteksimamt’i. Yoğ ise kodoxedut’es. Dulya zamanimuşis are.

TÜRKÇE SÖYLEŞİ İÇİN TIKLAYINIZ...